ஒளிப்பதிவாளர் விஜய் ஆம்ஸ்ட்ராங் இயக்குநராக அறிமுகமாகும் ‘வன மடி’

 ஒளிப்பதிவாளர் விஜய் ஆம்ஸ்ட்ராங் இயக்குநராக அறிமுகமாகும் ‘வன மடி’

“2D திரையிலிருந்து 3D இயற்கைக்குத் திரும்புங்கள்!” – சுற்றுச்சூழல் விழிப்புணர்வோடு உருவாகும் ‘வன மடி’!

35 சர்வதேச திரைப்பட விழாக்கள்… 4 விருதுகள்! – சர்வதேச அளவில் கவனம் ஈர்க்கும் ‘வன மடி’!

சென்டர் சீட் சினிமாஸ் (Center Seat Cinemas) விஜயராகவன் தயாரிப்பில், ஞானம் சுப்பரமணியனின் நிர்வாக மேலாண்மையில் உருவாகும் படம் ‘வன மடி’.

‘மாத்தி யோசி’, ‘தொட்டால் தொடரும்’, ‘அழகு குட்டி செல்லம்’, ‘புகைப்படம்’ உள்ளிட்ட அழகிய திரைப்படங்களுக்கு ஒளிப்பதிவாளராகப் பணியாற்றிய விஜய் ஆம்ஸ்ட்ராங் இந்தப் படத்தின் மூலம் இயக்குநராக அறிமுகமாகிறார்.

கால மாற்றங்கள் நம்மையும், நம் சந்ததிகளையும் ஒரு வலிமையான சுழிக்குள் இழுத்துக்கொண்டு போய்க் கொண்டிருக்கிறது.

இயல்பான மனிதர்கள் தங்களுக்குள் அன்பும், தேடுதலும் இயந்திரகதிக்குள் ஒளிந்துகொண்டுவிட்டன என்பதைத் தனது எளிய மொழியில் விஜய் ஆம்ஸ்ட்ராங் சொல்லியிருப்பதே ‘வன மடி’ படத்தின் கரு.

முற்றிலும் புதியவர்கள் நடித்துள்ள ‘வன மடி’ படத்திற்கு திரைக்கதை, வசனம் எழுதியுள்ளதுடன் ஒளிப்பதிவும் செய்திருக்கிறார் விஜய் ஆம்ஸ்ட்ராங்.

அமெரிக்காவில் வசிக்கும் ராலே ராஜன் இப்படத்திற்கு இசையமைத்திருக்கிறார்.

ராலே ராஜன் அமெரிக்காவில் நமது தமிழ்ச் செய்யுள்கள் பலவற்றை இசை வடிவமாக மாற்றும் வேலையைச் செய்து வருகிறார்.

இவரது இசையில் வன மடி படத்தில் மால்குடி சுபா ஒரு பாடல் பாடியிருக்கிறார்.

அதேபோல சூப்பர் சிங்கர் ஜூனியர் வெற்றியாளர் கிரிஷாங், சூர்யா மற்றும் மமிதா பைஜு நடிப்பில் உருவாகியுள்ள விஸ்வநாத் அண்ட் சன்ஸ் (Vishwanath and Sons) திரைப்படத்தின் உணர்ச்சிப்பூர்வமான “ஆரிராரோ ஆரிரோ” பாடலைப் பாடியவர்… இந்தப் படத்திலும் பாடல் ஒன்றைப் பாடியிருக்கிறார்.

பாடல்களை ரமேஷ் வைத்யா எழுதியுள்ளார். ‘அழகு குட்டி செல்லம்’, ‘லால் சலாம்’ படங்களில் பணியாற்றிய பிரவீன் பாஸ்கர் இந்தப் படத்தின் படத்தொகுப்பைக் கவனிக்கிறார்.

படம் முழுமையாகத் தயாராகியுள்ள நிலையில், கிட்டத்தட்ட 35 சர்வதேச திரைப்பட விழாக்களுக்கு அனுப்பி வைக்கப்பட்டுள்ளது.

அதில் 7 சர்வதேச திரைப்பட விழாக்களில் தேர்வாகி, அவற்றில் 4 திரைப்பட விழாக்களில் வெவ்வேறு பிரிவுகளில் விருதுகளையும் வென்றுள்ளது.

மீதமிருப்பவை விருதுகளின் அறிவிப்புகளுக்காகக் காத்திருக்கின்றன. அடுத்ததாக கோவாவில் நவம்பர் மாதம் நடக்க இருக்கும் இந்தியன் பனோரமாவிலும் இந்தப் படம் கலந்து கொள்ள உள்ளது.

இயக்குநர் விஜய் ஆம்ஸ்ட்ராங் படம் பற்றிக் கூறும்போது, “இப்படம் இயற்கை சம்பந்தப்பட்டது. தாய் மடி என்பது போல வன மடி என்ற பெயரை வைத்துள்ளோம். இந்தப் படம் எதிர்காலத் தலைமுறைக்கான படம் மட்டுமல்ல, குறிப்பாக அனைத்துப் பெற்றோர்களுக்குமான படமும் கூட.

திரைப்பட விழாக்களில் இப்படம் முக்கிய கவனம் பெற்று வருவது மகிழ்ச்சியளிக்கிறது.

இந்தப் படத்தை 6 முறை தேசிய விருது பெற்ற எடிட்டர் B. லெனின் பார்த்தார். படம் அவருக்கு ரொம்பவே பிடித்துவிட, அவர் தன்னுடைய தந்தை, இயக்குநர் பீம்சிங்கின் புத்தா பிக்சர்ஸ் என்கிற பேனரில் இந்தப் படத்தை ரிலீஸ் செய்ய இருக்கிறார். அதுவே இப்படத்திற்குக் கிடைத்த சிறந்த விருதாகக் கருதுகிறேன்.

‘வன மடி’ விரைவில் திரையரங்குகளில் வெளியாக உள்ளது” என்றார் இயக்குநர், ஒளிப்பதிவாளர் விஜய் ஆம்ஸ்ட்ராங்.