பா.இரஞ்சித் தயாரிப்பில் தற்கால அரசியலை பேசும் இசைத்தொகுப்பு

 தமிழ் ஹிப்ஹாப் இசைத்தொகுப்பு  "தெருக்குரல் "

தமிழ் ஹிப்ஹாப் என்றவுடனே "மடை திறந்து னா னா னான" என்ற யோகி B யும், "கிளப்புள மப்புல திரியுர பொம்பள" என்று பாடிய ஹிப்ஹாப் தமிழாவும் தான் நம் நினைவுக்கு வருவார்கள். ஆனால்..அதையெல்லாம் கடந்து இப்போது உலகத்தரத்தில் ஒரு ஹிப்ஹாப் ஆல்பம் தமிழில் வெளியாகி இருக்குன்னா நம்ப முடியகிறதா? ஆம்.. #தெருக்குரல் என்ற பெயரில், தி கேஸ்ட்லஸ் கலெக்டிவ் அறிவு மற்றும் ஆஃப்ரோ இருவரும் இணைந்து உருவாக்கியுள்ள இந்த ஆல்பம் இசைப் பிரியர்கள் பலரையும் வெகுவாகக் கவர்ந்து வருகிறது. 

"என்னா நான் உனக்கு Anti Indian Ah??

Bore அடிக்குது போராடலாம் வாங்க தோழர்.. 

" நீ என்பது ஓட்டு மட்டுமே, நாடு என்பதே ரேட்டு மட்டுமே. "

...என் திமிரான தமிழச்சியே. 

..தூத்துக்குடி ஸ்னோலின் குறித்த பாடல்,  என

சமீபத்திய நிகழ்வுகள் அத்தனையும் பாடி வியக்க வைக்கும் இந்த ராப் ஆல்பத்தில் மொத்தம் 7 பாடல்கள்.

கள்ளமௌனி- என்ற நாம் கேட்டிராத புதிய வார்த்தையோடு தொடங்குகிறது ஆல்பம். முதல் பாடலிலேயே, ப்பா..என்னடா பொசுக்குனு இப்படி சொல்லிப்புட்ட என்ற அளவு கலாய் வரிகளால் தற்கால அரசியலை வச்சு செஞ்சிருக்காங்க. அதனைத் தொடர்ந்து அடுத்த அதிரடியாக ஏற்கனவே இணையத்தளத்தில் வைரலாகப் பரவிய #anti indian பாடல். இருக்கின்ற சமூகப் பிரச்சினைகள் அத்தனையையும் ஒரே பாடலில் சொல்லியிருக்கு அந்த ராப் இன் கோபமும் வேகமும் கேட்கிற ஒவ்வொருவரையும் எவ்வளவு மோசமான சமூக சூழலில் நாம வாழறோமேன்னு சிந்திக்க வைக்கிறது.

இந்தியாவின் வட எல்லை ஜம்முவில் காமவெறியர்களால்  கொல்லப்பட சிறுமி ஆசிஃபாவும், கடைக்கோடித் தெற்கில் தூத்துக்குடியில் நடந்த துப்பாக்கிச் சூட்டில் கொல்லப்பட்ட ஸ்னோலினும் ஒரு கடிதம் எழுதுகிறார்கள், நம் எல்லாருக்கும்.

"நான் ஸ்னோலின் பேசுறேன் 

உன் காதில் விழுதா.. 

என் தங்கை ஆசிஃபா.. 

என்கூடதான் இருக்கா.. ".

 இந்தப் பாடல் கண்களில் கண்ணீரை வரவழைக்கிறது. 

" இருண்ட கருவரைக்குள் கடவுள் முன்பு நடந்ததென்ன, ஒருவேளை நா பொண்ணா பிறக்காம..மாடா பிறந்திருந்தா? " போன்ற வரிகள் தமிழ் இசையுலகிற்கு முற்றிலும் புதிது. 

வழக்கமான பெண்களை அழகு என வர்ணித்தல், இல்ல விட்டுட்டு போய்ட்டாளே என வசைமொழி பாடுதல், காதலை மிகைப்படுத்தி உணர்ச்சிப்  பூர்வமான கவிதை வரிகள் , இவை எதுவும் இல்லாத ஒரு பெண்ணின் திமிரை, சுதந்திரத்தை, விருப்பங்களை ஆண் கொண்டாடும்,  வித்தியாசமான ரொமான்டிக் தமிழ் பாடல் திமிரான தமிழச்சி..

வரிகள் ஒவ்வொன்றிலும் மனித உரிமைகளையும், வாழ்வியலையும், மக்கள் பிரச்சனைகளயும் வெளிப்படையாகப் பேசும், அரசியல் ஹிப்ஹாப் #தெருக்குரல், ஆல்பத்தை இயக்குநர் பா.இரஞ்சித் வழங்கும் தி கேஸ்ட்லஸ் கலெக்டிவ் இசைக்குழுவின் பாடலாசிரியர், பாடகர் அறிவு, தனியிசைக் கலைஞர், இசையமைப்பாளர் ஆஃப்ரோ ofRo, இருவரும்  Arivu x ofRO என்ற மேடைப் பெயரில்  உருவாக்கியுள்ளனர். 

இந்த ஆல்பம்தான் தமிழ் ஹிப்ஹாப் வரலாற்றிலேயே பெஸ்ட் என பலரும் சமூக வலைத்தளங்களில் எழுதி வருகிறார்கள். கடந்த பத்தாண்டுகளில் வெளிவரும் ஒரே தமிழ் ஹிப்ஹாப் ஆல்பம் #தெருக்குரல் என்பது குறிப்பிடத்தக்கது. 

இதில் இசையமைப்பாளர் டென்மா மற்றும் மலேசிய ராப் கலைஞர் ரோஷன் ஜாம்ராக் ஆகியோரும் பாடியுள்ளனர். 

பாடலாசிரியர் அறிவு "காலா" படத்தில் வரும் "உரிமையை மீட்போம்" பாடல் மூலமாக சினிமாவுக்குள் அறிமுகம் ஆனவர். அதனைத் தொடர்ந்து, வடசென்னை, ஜிப்ஸி, நட்பே துணை உள்ளிட்ட பல படங்களில் பாடல்கள் எழுதி பாடி வருகிறார். ஆஃப்ரோ, கோலிவுட்டின் ஹாரிஸ் ஜெயராஜ், டி. இமான், சந்தோஷ் நாராயணன் உள்ளிட்ட பல இசையமைப்பாளர்களோடு பணிபுரிந்தவர். அனேகன், என்னை அறிந்தால்,   வனமகன், உள்ளிட்ட இருபதுக்கும் மேற்பட்ட படங்களில் பிண்ணனி இசைத் தொழில்நுட்பக் கலைஞராக பணிபுரிந்துள்ளார்.

தனியிசை மற்றும் ஹிப்ஹாப் மீது மிகுந்த ஆர்வம் கொண்ட இருவரும் கடந்த ஒரு ஆண்டு உழைப்பில் மிக நேர்த்தியாக உருவாக்கிய #தெருக்குரல் இப்போது தமிழ் ஹிப்ஹாப்பை அடுத்த கட்டத்துக்கு நகர்த்திச் சென்றுள்ளது எனலாம்.

மக்களுக்கிடையே பிரிவினைகளை ஊன்ற பள்ளிப் பாடப்புத்தகத்தில் கூட விஷமமான் மாற்றங்கள் கொண்டு வரும்  சூழலில். இருக்கிற சமூக அவலங்களை, சமத்துவத்தின் தேவையை, மனித மாண்பை துணிச்சலாகவும் தெளிவாகவும் உரத்துப் பேசியிருக்கும் #தெருக்குரல் தமிழ் ஹிப்ஹாப் அனைவரும் அவசியம் கேட்க வேண்டிய ஒன்றுதான். 

பாடல்களைக் கேட்க இந்த லிங்க்கைத் தொடரவும்.

கள்ளமௌனி பாடலின் மியூசிக் வீடியோ, வரும் ஞாயிறு காலை 9 மணிக்கு, தி கேஸ்ட்லஸ் கலெக்டிவ் யூடியூபில் வெளியிடப்பட உள்ளது. 

இயக்குநர் பா.இரஞ்சித்தின் கிராமங்களை நோக்கிய பயணம்!!

*"மக்களை அரசியல் மற்றும் சட்டரீதியாக விழிப்புணர்வு அடையச் செய்வதே நோக்கம் - இயக்குநர் பா.இரஞ்சித்தின் கிராமங்களை நோக்கிய பயணம்!!"*

கலைத்துறையில் சமூக மாற்றத்தினை குறிக்கோளாக வைத்து இயங்குபவர்களில் இயக்குநர் பா.இரஞ்சித் மிக முக்கியமானவர். திரைப்படங்களில் அரசியல், மேடைகளில் உரையாடல் என தேங்கிவிடாமல் களத்திற்குச் சென்று ஒடுக்கப்பட்டுக் கொண்டிருக்கும் மக்களுக்கு தோள் கொடுத்து தோழனாக நிற்கிறவராக அவர் இருக்கிறார்.

அந்த வகையில் ஒடுக்கப்பட்ட மக்களுக்கான அரசியல் விழிப்புணர்வின் அவசியத் தேவையை அடிப்படையாகக் கொண்டு அவருடைய "நீலம் பண்பாட்டு மையம்" இயக்கத்தின் சார்பில் வேலூர் மற்றும் கிருஷ்ணகிரி மாவட்டங்களில் மூன்று நாட்கள் சுற்றுப் பயணம் மேற்கொண்டு சட்ட ஆலோசனை மையம், இரவு பாடசாலை, நூலகம் ஆகியவற்றை திறந்து வைத்துள்ளார் இயக்குநர் பா.இரஞ்சித்.

வேலூர் மாவட்டத்தில் ஆம்பூர் மற்றும் வாணியம்பாடி பகுதிகளிலும். கிருஷ்ணகிரி மாவட்டத்தில் பென்னக்கல், கௌதாமல், மத்திகிரி, பூதக்கோட்டை, மல்லசந்திரம் ஆகிய கிராமங்களில் "டாக்டர் அம்பேத்கர் அரசியல் பள்ளி" என்ற இரவு பாடசாலையினை தொடங்கி வைத்திருக்கிறார். 

"இந்த இரவு பாட சாலையின் மூலம், அரசியல் மற்றும் சட்ட விழிப்புணர்வை மக்களுக்கு ஏற்படுத்தி அறிவார்ந்தவர்களாக நெறிப்படுத்துவதே நோக்கம். இதைப்போலவே தமிழகம் முழுக்க இருக்கிற கிராமங்களிலும் இதனை செயல்படுத்தும் திட்டமும் இருக்கிறது. இந்த நிகழ்வினை ஒருங்கிணைக்க ஒத்துழைத்த ஜெய்பீம் பேரவை மற்றும் டாக்ர் பீமாராவ் அம்பேத்கர் இளைஞர் மன்றம் ஆகியோருக்கு நன்றிகள்" என்றார் இயக்குநர் பா.இரஞ்சித்.

அவரின் இந்த செயல்பாட்டிற்கு அந்தப் பகுதி மக்களிடத்தில் பெரும் வரவேற்பைப் பெற்றிருக்கிறது.

தமிழ்க்குடியின் ஆதி இசையை மியூசிக் அகாடமி மேடையேற்றிய இயக்குநர் பா.இரஞ்சித்

தமிழ் நிலத்தின் கலை வடிவங்களை பொதுமைப் படுத்துவதில் பேரார்வமும், பெருமுயற்சியும் கொண்டிருப்பவர் இயக்குநர் பா.இரஞ்சித்.

அந்த வகையில் சமீபத்தில் அவரின் "நீலம் பண்பாட்டு மையம்" ஒருங்கிணைத்து நடத்திய "வானம் கலைத் திருவிழா" மூன்று நாள் நிகழ்வு பெரும் வரவேற்பையும், பாராட்டுக்களையும் பெற்றது.

அதன் தொடர்ச்சியாக "தி கேஸ்ட்லெஸ் கலெக்டிவ்" மற்றும் "ரூட்ஸ் 2" குழுவினர் ஒருங்கிணைத்த "ஒரு ஒப்பாரி ஷோ" நிகழ்ச்சி மயிலாப்பூர் மியூசிக் அகாடமியில் நடைபெற்றது.

நிகழ்த்துக் கலைகளில் மிக முக்கியமானதாக கருதப்படும் ஒப்பாரியானது, முதல் முறையாக ஒரு பொது மேடையில் அரங்கேறியது பார்வையாளர்களை மெய்சிலிர்க்கச் செய்தது. இந்நிகழ்ச்சியில்

சென்னை, திருவள்ளூர், வேலூர், திருவண்ணாமலை ஆகிய நான்கு மாவட்டத்தில் உள்ள ஒப்பாரிக் கலைஞர்கள் பங்குபெற்று பாடினார்கள்.

தமிழகத்தின் பல மாவட்டங்களில் இருந்து முன்பதிவு செய்து பார்க்க வந்திருந்த பார்வையாளர்களைத் தாண்டி ஆந்திரா, கேரளா மற்றும் மஹாராஷ்ட்ரா மாநிலங்களில் இருந்து கூட இந்த நிகழ்ச்சியை பார்ப்பதற்காக மட்டுமே வந்திருந்தவர்களும் இருந்தார்கள்.

நிகழ்ச்சியின் இறுதியில், பங்குபெற்ற இசைக் கலைஞர்களுக்கு இயக்குநர் பா.இரஞ்சித் கௌரவித்தார். மேலும் இந்நிகழ்ச்சியை நடத்துவதற்கு ஒத்துழைப்பு வழங்கிய "மியூசிக் அகாடமி" நிர்வாகத்திற்கு நன்றியினைத் தெரிவித்துக் கொண்டார்.

நிகழ்ச்சிக்கு வந்திருந்த பார்வையாளர்கள் முதல் முறையாக ஒப்பாரியை ஒரு பெரிய மேடையில் பார்த்தது குறித்து மகிழ்ச்சி தெரிவித்தார்கள். இயக்குநர் பா.இரஞ்சித் இதுபோல நிகழ்ச்சிகளை தமிழகத்தின் எல்லா மாவட்டங்களிலும் ஒருங்கிணைக்க வேண்டுமென நெகிழ்ச்சியுடன் வேண்டுகோள் வைத்தனர்

இயக்குனர் பா.இரஞ்சித் திரைப்படங்களை இயக்குவதோடு தயாரிப்பாளராக படங்கள் தயாரித்து வருகிறார்.

அந்த வகையில்  "பரியேறும் பெருமாள்" படத்தின் வெற்றியைத் தொடர்ந்து தற்போது "இரண்டாம் உலகப் போரின் கடைசி குண்டு" என்கிற படத்தை தயாரித்து வருகிறது இவருடைய "நீலம் புரொடக்‌ஷன்ஸ்" நிறுவனம்.

இந்நிலையில் மும்பையைசேர்ந்த ஆவணப் பட இயக்குநர் ஜோதி நிஷா-வுடன் கைகோர்க்கிறது "நீலம் புரொடக்‌ஷன்ஸ்" நிறுவனம். 

"பி.ஆர் அம்பேத்கர் - இன்றும் நாளையும்" என்கிற இந்த ஆவணப் படத்தை இயக்குநர் ஜோதி நிஷாவுடன் இணைந்து தயாரிக்கிறார் இயக்குநர் பா.இரஞ்சித்.

90 நிமிடங்கள் நீளமுள்ள இந்த ஆவணப் படத்தில் புரட்சியாளர் அம்பேத்கரின் மதம் குறித்த பார்வை, சுதந்திரம், இந்தியாவில் புராணங்கள்,  இந்திய அரசியலில் சாதி நிறுவனமாக்கப்பட்டது, இந்தியாவில் ஒடுக்கப்பட்டோர் மற்றும் பெண்களின் நிலை ஆகியவை உள்ளிட்ட பலவற்றை ஆவணப்படுத்த திட்டமிட்டிருக்கிறார்கள். 

மேலும் ஒடுக்கப்பட்ட மக்களின் போராட்டங்கள், பேரணிகள், ஹார்வேர்டு பல்கலைக் கழக பேராசிரியர்களின் பேட்டிகள், தலித் அரசியல் களத்தில் இயங்கும் படைப்பாளிகளின் பேட்டிகள் என பல வருடங்களாக தான் சேகரித்து வைத்தவற்றை எல்லாம் இந்த ஆவணப் படத்தில் இணைத்திருக்கிறார் இயக்குநர் ஜோதி நிஷா.

இந்த ஆவணப் படம் குறித்து அவர் கூறுகையில்,

"இந்திய இலக்கியங்கள் மற்றும் சினிமாவில் நாயக கண்ணோட்டத்தில் இருந்து புறக்கணிக்கப்பட்டவற்றை இதில் ஆவணப் படுத்த இருக்கிறோம். குறிப்பாக வெகுஜன ஊடகங்கள் பேச மறுத்த வரலாறுகளை பதிவு செய்கிறோம். சமூக அரசியல் சூழல் மாறியிருக்கும் இந்நேரத்தில் "பி.ஆர் அம்பேத்கர் - இன்றும் நாளையும்" ஆவணப்படம் பெண்ணிய நிலைப்பாட்டில் இருந்து சமூகப் புரட்சியையும், பெரும்பான்மை மக்களின் வாழ்விடம் மற்றும் பார்வை குறித்தும் பேச இருக்கிறோம்" என்றார்.

"இந்த ஆவணப்படம் நிச்சயம் வரலாற்றை எழுதும், இதில் இணைந்து பணியாற்றுவதில் மிக்க மகிழ்ச்சி" என்று தெரிவித்திருக்கிறார் இயக்குநர் பா.இரஞ்சித்.

இந்தி மற்றும் ஆங்கில மொழிகளில் வெளியாகிறது "பி ஆர் அம்பேத்கர் இன்றும் நாளையும் " ஆவணப்படம்.

Director Pa Ranjith talks about Samathuvam Arithal

Director Pa.Ranjith talks about "SAMATHUVAM ARITHAL" 

எழுத்தாளர்களுக்கு சமூகப்பொறுப்பு அவசியம் " இயக்குனர் பா.இரஞ்சித்

“நீலம் பண்பாட்டு மையம்” சார்பில் இளம் எழுத்தாளர்களுக்கான பயிலரங்கு நிகழ்வு "சமத்துவம் அறிதல்" என்ற தலைப்பில் மூன்று நாட்கள் (25, 26, 27.10.2018) திண்டிவனத்தில் நடைபெற்றது. இந்த நிகழ்வில் தமிழகம் மற்றும் வெளி மாநிலங்களைச் சேர்ந்த இளம் எழுத்தாளர்கள் பலர் கலந்துகொண்டனர்.

”உளவியலை கட்டமைக்கும் உட்கூறுகள்”, “தமிழகத்தில் கலையும் இலக்கியமும்”, “கலை இலக்கியத்தில் சாதி”, “பொதுப்புத்தியை உதிர்த்தல்”, “சாதி மறுப்பு சாதி ஒழிப்பின் தேவையும் சாத்தியங்களும்” , “சாதி ஒழிப்பு சமத்துவக்கருத்தியலை கலை இலக்கிய வடிவங்களாக்குதல்”  ஆகிய தலைப்புகளின் கீழ் எழுத்தாளர்கள் ஆதவன் தீட்சண்யா, அ.மார்க்ஸ், அழகிய பெரியவன், AB.ராஜசேகரன், யாழன் ஆதி, பிரளயன், சுகிர்தா ராணி, வ.கீதா, பாமா உள்ளிட்டோர் சிறப்புரையாற்றினார்கள்.

   

நிகழ்வில்  உரையாற்றிய இயக்குனர் பா.இரஞ்சித்,

”எழுத்தாளர்களுக்கு சமூகப் பொறுப்பு அவசியம்.  வாசித்தலும் ,எழுத்தும் இன்றைய காலகட்டத்தில் மிக மிக அவசியமானதாக இருக்கிறது.  புத்தகங்கள் மட்டுமே நம்மை கேள்விகள் கேட்டுக்கொண்டே இருக்கும். இந்த சமூகத்தில் இருக்கும் பாகுபாடுகள், அரசியல் , வாழ்வியல் வரலாறுகளை புத்தகங்களே நம்மை கேள்வியெழுப்ப வைக்கும். இந்த மூன்று நாள் நிகழ்வு இளம் எழுத்தாளர்களுக்கு பெரும் பயனுள்ளதாக இருந்தது , நான் இந்த நிகழ்வுக்கு ஒரு மாணவனாகத்தான் கலந்துகொண்டேன்,பெரும் பயனுள்ளதாக இருந்தது, கலை இலக்கிய களத்தில் தொடர்ந்து இதுபோன்ற நிகழ்வுகளை நடத்துவோம்”  என்றார்.

மூன்று நாள் நிகழ்விலும் கலந்து கொண்ட இளம் எழுத்தாளர்கள், “இதுபோன்ற முன்னெடுப்புகள் மிக அவசியமானவை. எழுத்துலகில் அடியெடுத்து வைத்திருக்கும் எங்களுக்கு பல கதவுகளை இந்த நிகழ்வு திறந்து விட்டிருக்கிறது. இதன் மூலம் எங்களுடைய புரிதலும், சமூகத்தின் மீதான அக்கறையும் கூடியிருக்கிறது. இந்த நிகழ்வை ஒருங்கிணைத்த “நீலம் பண்பாட்டு மையம்” தோழர்களுக்கு நன்றி” எனக் கூறினார்கள்.

மேலும் நிகழ்வின் சிறப்பம்சமாக, மூன்று நாட்கள் இரவிலும் “பேராவூர் ரூபகம் தெருக்கூத்து சபாவின் மதுரை வீரன் நாடகம்”, “சென்னை கலைக்குழுவின் வீதி நாடகங்கள்” போன்ற தெருக்கூத்து நாடகங்கள் அரங்கேற்றப்பட்டன.